الفنانة زينة عماد تخص “اليوم” في حوار قبل حفلتيها القادمة
في توقيت يجمع بين الرياضة والفن، تطل الفنانة زينة عماد بصورة مختلفة تعكس شخصيتها القريبة والعفوية، حضور في مدرجات البادل بشغف المشجعة، واستعداد لخطوة فنية استثنائية تقودها كأول فنانة تغني في أكواريبيا بالقدية.
بين أجواء الحماس في الملاعب، وكواليس التحضير لحفلات مرتقبة، تفتح زينة قلبها لـ “اليوم”، لتتحدث عن تجربة جديدة تقودها بنفسها، كأول فنانة تغني في أكواريبيا بالقدية.
## البادل .. متعة الحضور بعيدًا عن المنافسة ##
* نشاهدك اليوم في بطولة البادل، وش سر اهتمامك في هذه الرياضة ؟
أنا بصراحة مهتمة في البادل جدًا، وصديقاتي لاعبات، ودائمًا أحب أحضر أشجعهم، الأجواء معهم مختلفة تمامًا، فيها حماس وطاقة حلوة. واليوم في دوري البادل الحضور جدًا ممتع.
* هل تمارسين اللعبة ؟
ألعب، لكن على خفيف جدًا وفي وقت الفراغ فقط، يعني للمتعة مو أكثر.
* ممكن نشوفك يوم تنافسين؟
لا مستحيل إني أشارك في بطولات البادل، بعيدة عني تمامًا، لكن ممكن أشارك في بطولات خيل، هذا شيء ممكن.
* وش أكثر شيء يعجبك في البادل؟
الأجواء نفسها، الحضور، التفاعل، الطاقة اللي تصير بين الناس. بعيدًا عن الفن، أحب أكون موجودة وأعيش التجربة.
* وش رسالتك للجماهير ؟
أتمنى الجميع يحضر منافسات نصف النهائي والنهائي، أجواء مختلفة ولازم الواحد يحضر.
## زينة عماد تفتتح المشهد الفني في القدية ##
* بتقيمين حفلتين في أكواريبيا بالقدية، وبتكونين أول فنانة تغنين هناك، حدثينا عن استعداداتك ؟
أنا جدًا جدًا سعيدة ومبسوطة بهالتجربة، وكوني أول فنانة تغني في أكواريبيا بالقدية هذا شيء كبير بالنسبة لي. أحسها مسؤولية بقدر ما هي فرصة جميلة، إني أكون من أوائل الفنانين اللي يشاركون في إطلاق الحفلات هناك، هذا شيء يدعو للفخر فعلًا. خصوصًا إن المشروع ضخم والكل متحمس له.
* بتقدمين حفلتين ممكن تعطينا تفاصيلها بشكل أكبر ؟
عندي حفلتين، يوم مخصص للسيدات، واليوم الثاني بيكون معي الفنان عايض، وهذا التنوع يعطي تجربة مختلفة،
وان شاء الله الحفلتين تكون على قد التوقعات ونقدر من خلالها نقيس أجواء الجمهور ونشوف كيف ممكن تتطور التجربة مستقبلًا.
* وش يعني لك إنك تكونين “الأولى” في هالمكان؟
•
يعني لي كثير، إحساس فخر وحماس بنفس الوقت. دايم تحب تكون جزء من البداية، لأن البداية هي اللي تنبني عليها كل التجارب الجاية.
* كيف شايفة فكرة الحفلة النسائية؟
تجربة جديدة عليّ تمامًا، خصوصًا إنها حفلة عامة لكن مخصصة للسيدات. الإحساس مختلف وحلو، ومتحمسة أشوف التفاعل، وحتى نفسي أعزم كل صديقاتي يحضرون.
* كيف قاعدة تجهزين لهالحفلات؟
قاعدة أركز على اختيار الأغاني اللي تناسب الأجواء، وأشتغل على تفاصيل العرض عشان تكون تجربة خفيفة وممتعة للجمهور، خصوصًا إن المكان مختلف.
* وش المود الغنائي اللي بنشوفه؟
بما إن الأجواء مسبح وبحر، والحفلات نهارية، فالمود بيكون فرفوشي وصيفي،
أغاني خفيفة، رقص، طاقة حلوة، بنعيش جو مختلف تمامًا.
* هل بنشوف مفاجآت في الحفلة؟
أكيد ما تخلو حفلة من مفاجآت لكن خلّوها وقتها.
* كلمة أخيرة للجمهور؟
أنا متأكدة إننا بنستمتع جدًا، واللي ما راح يحضر، ترى بزعل منكم (قالتها ضاحكة).
جدة 24 ، موقع إخباري شامل يهتم بتقديم خدمة صحفية متميزة للقارئ، وهدفنا أن نصل لقرائنا الأعزاء بالخبر الأدق والأسرع والحصري بما يليق بقواعد وقيم الأسرة السعودية، لذلك نقدم لكم مجموعة كبيرة من الأخبار المتنوعة داخل الأقسام التالية، الأخبار العالمية و المحلية، الاقتصاد، تكنولوجيا ، فن، أخبار الرياضة، منوعات و سياحة.
